Sviðslistahópurinn 16 elskendur er samstarf listamanna úr ólíkum geirum, leiklist, myndlist, tónlist, danslist og gjörningalist. 16 elskendur setja upp sýningar þar sem mörk hefðbundinna leiksýninga eru máð og þannig látið reyna á mæri raunveruleika og sýningar. Í efnistökum sínum leitast 16 elskendur við að prófa og teygja orðræðu líðandi stundar og bjóða áhorfendum í „tilraunastofu“ þar sem þeirra eigið samfélag, hugsjónir og gildi eru krufin, þar sem áhorfendur og leikendur skoða samsetningu þjóðfélagsins í sameiningu.

16 elskendur hafa sýnt verk sín á Listahátíð í Reykjavík og á alþjóðlegu leiklistarhátíðinni Lókal, auk þess sem hópurinn hefur tekið þátt í samstarfi við Þjóðleikhúsið, Þjóðmenningarhúsið og nú síðast Félagsvísindastofnun Háskóla Íslands. 16 elskendur voru tilnefnd til tveggja Grímuverðlauna árið 2012; leikskáld ársins og sproti ársins, fyrir leiksýninguna Sýning ársins, og hlutu verðlaunin fyrir sprota ársins.

Aðferðafræði 16 elskenda byggir á hugmyndinni um beint lýðræði og eru verkin alltaf unnin í þverfaglegri vinnustofu án þess að eiginlegur leikstjóri eða höfundur komi við sögu.


Aðalbjörg Árnadóttir

_MG_9354.jpg

Aðalbjörg Árnadóttir útskrifaðist árið 2005 frá leikarabraut Leiklistardeild Listaháskóla Íslands. Hún hefur m.a. leikið í uppsetningum Borgarleikhússins á Gosa, Gítarleikurunum og Líki í óskilum. Þá hefur Aðalbjörg starfað með fjölda sjálfstæðra leikhópa, t. a. m. leikið í sýningunum Súldarsker, Grease, Ufsagrýlur, Jöklar, Footloose, Sýning ársins og Hættuför í Huliðsdal. Einnig hefur hún leikið í sjónvarpsþáttum, útvarpsleikritum og stuttmyndum. Aðalbjörg er meðlimur í leikhópunum 16 elskendur, Áhugaleikhús atvinnumanna og Soðið svið. Aðalbjörg starfaði hjá Leikfélagi Akureyrar frá 2012-2014.  Þar leik hún meðal annars í Leigumorðingjanum, Sek, Kaktusnum og Gullna hliðinu. 


Brynja Björnsdóttir

  Brynja Björnsdóttir útskrifaðist frá Myndlistardeild Listaháskóla Íslands árið 2008 og frá The Royal Central School of Speech and Drama með MA gráðu í leikmyndahönnun árið 2013. Meðal verka sem hún hefur hannað má nefna leikmynda- og búningahönnun fyrir Ekki hætta að anda í Borgarleikhúsinu 2015. Leikmynda- og búningahönnun fyrir sýningarnar Gaukar og Bláskjár í Borgarleikhúsinu 2014. Leikmyndahönnun fyrir dansverkið Skrattinn úr sauðaleggnum í Þjóðleikhúsinu 2014 og Petra sem frumsýnt var á LÓKAL sama ár. Leikmyndahönnun fyrir Hættuför í Huliðsdal í Þjóðleikhúsinu og Hús Bernhörðu Alba í Borgarleikhúsinu 2013. Dansverkið Glymskrattinn sem frumsýnt var á Listahátíð í Reykjavík árið 2012 og Kameljón sem frumsýnt var á LÓKAL sama ár. Hún hannaði einnig leikmynd fyrir verkin Súldarsker og Eftir lokin sem frumsýnd voru árið 2011. Brynja er meðlimur í sviðslistahópnum 16 elskendur sem settu ma. upp Nígeríusvindlið árið 2010 og Sýningu ársins árið 2012. Brynja var tilnefnd til Grímuverðlauna fyrir leikmynd ársins árið 2011 fyrir Súldarsker.

https://brynjabjorns.wordpress.com/

 

 

 

 

 


Davíð Freyr Þórunnarson 

_MG_9543.jpg

 

 

Davíð Freyr Þórunnarson útskrifaðist sem leikari vorið 2007, úr Film/Teaterskolen Holberg í Kaupmannahöfn og er að ljúka meistaranámi í menningarstjórnun við Háskólan á Bifröst. Davíð hefur tekið þátt í hinum ýmsu verkefnum á leiksviði, í útvarpi og á hvíta tjaldinu, meðal annars í kvikmyndunum Bjarnfreðarson og Óróa, auk fjölda sjónvarpsauglýsinga og öðru efni fyrir sjónvarp, hérlendis sem og erlendis. Nýjustu verkefnin eru aðalhlutverk í auglýsingaherferð fyrir Prins Póló í Póllandi fyrir árið 2014 og í alþjóðlegri kvikmynd, The Calculator. Davíð gekk til liðs við sviðslistahópinn 16 elskendur fljótlega eftir útskrift og hefur unnið með þeim að verkefnunum ÍKEA-ferðir, Nígeríusvindlið – verk-í-vinnslu, Nígeríusvindlið og Sýningu ársins. Leikhópurinn Óskabörn Ógæfunnar hefur einnig notið krafta Davíðs í jólasýningunni Nóttin var sú ágæt ein, sem sýnd hefur verið í Tjarnabíói síðustu tvö ár.

 


Eva Rún Snorradóttir

 

Eva Rún Snorradóttir útskrifaðist með B.A gráðu í Leiklist – fræði og framkvæmd frá Listaháskóla Íslands vorið 2008. Eva Rún er ein af stofnendum og listrænum stjórnendum Framandverkaflokksins Kviss búmm bang, en jafnframt er hún meðlimur í sviðslistahópnum 16 elskendur. Heimsendir fylgir þér alla ævi, fyrsta ljóðabók hennar kom út haustið 2013. 

 


Friðgeir Einarsson

Friðgeir Einarsson starfar sem leikari, leikstjóri og höfundur. Friðgeir útskrifaðist frá leiklistardeild Listaháskóla Íslands árið 2008 með B.A. gráðu í fræði og framkvæmd. Hann hefur síðan unnið sjálfstætt og í samstarfi við nokkra sjálfstæða leikhópa, t.a.m. leikhópana Ég og vinir mínir og 16 elskendur. Undanfarin ár hefur Friðgeir tekið þátt í sýningum á borð við Húmanímal, Verði þér að góðu, Nígeríusvindlinu og Ókyrrð, sem og leikið í sjónvarpsþáttunum Heimsendi. Nýjasta einstaklingsverk Friðgeirs, Ekkert, var sýnt á Sequences hátíðinni í Reykjavík 2011 og fól í sér útgáfu bókarinnar Leiðarvísir til handa leikmönnum um merkingarhraðal. Friðgeir er jafnframt með B.A. gráðu í íslensku frá Háskóla Íslands.

http://www.fridgeireinarsson.com/


Gunnar Karel Másson

Gunnar Karel fæddist 1984 í Reykjavík. Snemma hóf hann tónlistarnám og hefur hann spilað á mörg mismunandi hljóðfæri. Sem tónskáld einbeitir Gunnar sér fyrst og fremst að kammertónlist, þar sem honum finnst tónlistin fá þá athygli sem að hún þarfnast. Gunnar Karel hefur séð um tónlist og hljóðmynd í ýmsum uppfærslum. Má þar á meðal nefna; Imrpovised history of the world, Gangverkið, Þrettándakvöld, Homo Absconditus, Nígeríusvindlið, Munaðarlaus, Fjöltengi og 2 pólskumælandi Rúmenar. Fyrir utan tónsmíðarnar þá hefur Gunnar einnig haslað sér völl sem tónleikahaldari. Sérstaklega má nefna Sonic hátíðina í Kaupmannahöfn, sem hann setti á laggirnar ásamt Filip C. de Melo árið 2012. Gunnar er jafnframt einn af listrænum stjórnendum tónleikaraðarinnar Jaðarber í Reykjavík og meðlimur í DKF, leikhópnum 16 elskendur og S.L.Á.T.U.R.

 

http://www.gkarel.net/

 

 


Hlynur Páll Pálsson

 

 

 Hlynur Páll Pálsson útskrifaðist með B.A. gráðu í leiklist, Fræði og framkvæmd, frá Leiklistardeild Listaháskóla Íslands árið 2009 og sýndi útskriftarverkið sitt Homo Absconditus á Alþjóðlegu leiklistarhátíðinni Lókal sama ár. Hann býr í Reykjavík ásamt konu og tveimur börnum og starfar sem listrænn ráðunautur hjá Borgarleikhúsinu, auk þess sem hann er framkvæmdastjóri Reykjavík Dance Festival og sjálfstætt starfandi sviðslistamaður. Frá útskrift hefur Hlynur leikstýrt tveimur sýningum, einleiknum Ellý alltaf góð eftir Þorvald Þorsteinsson og sýningunni Fjöltengi, með leikhópnum homo ludens, sem sýnd var á Bifreiðastöð Íslands (BSÍ), á artFart sviðslistahátíðinni árið 2010. Hlynur er menntaður bókmenntafræðingur og starfaði sumrin 2012 - 2013 sem leikstjóri Götuleikhúss Hins Hússins. Hann er meðlimur í sviðslistahópnum 16 elskendur og homo ludens.


Karl Ágúst Þorbergsson 

Karl Ágúst Þorbergsson útskrifaðist með B.A. gráðu í leiklist, Fræði og framkvæmd, frá Listaháskóla Íslands árið 2008. Karl Ágúst er einn af stofnendum sviðslistahópsins 16 elskendur sem hefur sett upp sýningarnar ÍKEA-Ferðir (2008),Orbis Terræ (2009) og Nígeríusvindlið (2009 og 2010) en hann hefur einnig tekið þátt í samsýningunum Æringi (2010) og Jónsvöku (2010). Karl hefur kennt við Listaháskóla Íslands og einnig í Prisma, samstarfi LHÍ og Háskólans á Bifröst. Sem stendur er Karl Ágúst búsettur í Berlín þar sem hann leggur stund á meistaranám við Listaháskólann í Berlín.


Ragnar Ísleifur Bragason 

Ragnar Ísleifur Bragason fæddist í Reykjavík. Hann kláraði Kvennaskólann í Reykjavík 1997 og því næst Fræði og framkvæmd í leiklistardeild Listaháskóla Íslands 2009. Ragnar er höfundur og leikari. Árið 2008 gaf hann út ljóðabókina Á meðan. Hann hefur unnið með ýmsum sjálfstætt starfandi leikhópum t.a.m. Vaðal, Kriðpleir og 16 elskendum. Undanfarin ár hefur hann meðal annars tekið þátt í sýningunum Var það gangári, Eyjaskegg, Blokk, Tiny Guy, Síðbúin rannsókn, Nígeríusvindlinu og Sýningu ársins. Ragnar hefur gaman af lífinu og tilverunni og á son sem hann fílar mjög vel.


Saga Sigurðardóttir

Saga Sigurðardóttir útskrifaðist sem danshöfundur frá hollenska listaháskólanum ArtEZ árið 2006 og hefur síðan starfað sjálfstætt sem dansari og danshöfundur með ýmsum listamönnum og flokkum bæði hérlendis og víðar um Evrópu. Auk þess að vera elskandi var Saga einn meðlima í sviðslistahópnum Ég og vinir mínir og er jafnframt annar meðlimur tvíeykisins saga&magga, ásamt Margréti Bjarnadóttur, en þær hafa unnið saman að eigin verkum síðan 2007. Saga&magga hlutu Grímuverðlaunin 2009 sem danshöfundar ársins fyrir vinnu sína í sýningunni Húmanimal eftir leikhópinn Ég og vinir mínir. Þá hlaut Saga einnig tilnefningar til Grímuverðlauna sem danshöfundur 2011 og 2014. Á undanförnum árum hefur Saga átt reglulegt samstarf við danslistamennina Anat Eisenberg (Berlín/Tel Aviv) og Alexandra Bachzetsis (Sviss) ásamt því að starfa með Leikhúsi listamanna, leiða reglulega námskeið m.a. við LHÍ, í LungA-skólanum á Seyðisfirði og Teesside Unitversity UK, og sitja í stjórnum Dansverkstæðisins og Reykjavik Dance Festival.


Ylfa Ösp Áskelsdóttir

Ylfa Ösp Áskelsdóttir útskrifaðist vorið 2007 úr Film og Teaterskolen Holberg í Kaupmannahöfn. Eftir útskrift gekk hún til liðs við 16 elskendur og hefur unnið með þeim sýningarnar ÍKEA-ferðir, Nígeríusvindlið – verk-í-vinnslu, Nígeríusvindlið og Sýningu ársins. Ylfa útskrifaðist með B.Ed. gráðu í grunnskólakennarafræðum frá Háskóla Íslands árið 2011. Hún starfar sem leiklistarkennari í Hlíðaskóla og einnig hjá Kramhúsinu í Reykjavík. Ylfa hefur leikið í útvarpsleikhúsi og auglýsingum.